تنش در مرز بدخشان؛ گفت‌وگوی طالبان و مرزبانان تاجیکستان پس از درگیری

منابع محلی در بدخشان از درگیری میان نیروهای طالبان و مرزبانان تاجیکستان در منطقه مرزی «داونگ» ولسوالی شهر بزرگ خبر می‌دهند. این رویداد روز یکشنبه پس از پیشروی شرکت‌های استخراج معدن چینی و دست‌کاری بستر دریای آمو رخ داده است.

ویدیوهایی که به خبرگزاری جمهور رسیده، صدای شلیک سلاح در محل درگیری را نشان می‌دهد.

در پی این حادثه، مقام‌های طالبان و نظامیان تاجیک روز سه‌شنبه (۴ سنبله) در نقطه مرزی شهر بزرگ گردهم آمدند. به گفته منابع، محور گفت‌وگوها مسایل مربوط به آب رودخانه آمو و فعالیت شرکت‌های معدنی بوده است.

با این حال، نشست دو طرف رنگ اتهام‌زنی نیز به خود گرفته است. مقام‌های طالبان، تاجیکستان را متهم کرده‌اند که به مخالفان مسلح این گروه پناه و آموزش می‌دهد. در مقابل، تاجیکستان نیز طالبان را به میزبانی از مخالفان دولت خود متهم ساخته است.

شفیق‌الله حفیظی، رئیس معادن طالبان در بدخشان، در این نشست ادعا کرده که تاجیکستان برای ۳۵۰ تن از مخالفان مسلح طالبان آموزش فراهم کرده است.

خبرگزاری جمهور- بدخشان