د بګرام د بیرته نیولو په اړه د امریکا د ولسمشر د وروستیو څرګندونو په وړاندې په نرم غبرګون کې، د طالبانو ډله وايي چې امریکا د دوحې په تړون کې ژمنه کړې وه چې د افغانستان د ځمکنۍ بشپړتیا او سیاسي خپلواکۍ پر وړاندې به زور او ګواښونه نه کاروي.

د جمهور آژانس د خبر له مخې د طالبانو ډلې نن یکشنبې (د وږي ۳۰ مه) په یوه اعلامیه کې د بګرام د هوایي ډګر د بیرته نیولو په اړه د امریکا د ولسمشر د وروستیو څرګندونو په تړاو وویل چې د طالبانو امارت د خپلو شرعي اصولو او متوازن او اقتصادي پلوه بهرنۍ پالیسۍ په رڼا کې، له ټولو هیوادونو سره د متقابلو او ګډو ګټو پر بنسټ مثبتې اړیکې غواړي.

طالبان وايي چې په ټولو دوه اړخیزو خبرو اترو کې، امریکا ته دا روښانه شوې ده چې د طالبانو امارت لپاره، د افغانستان خپلواکي او ځمکنۍ بشپړتیا تر بل هر څه مهمه ده.

په اعلامیه کې زیاته شوې چې د دوحې په تړون کې، امریکا ژمنه کړې وه چې د افغانستان د ځمکنۍ بشپړتیا او سیاسي خپلواکۍ پر وړاندې به له زور او ګواښ څخه کار نه اخلي، او نه به یې په کورنیو چارو کې لاسوهنه کوي، نو د دوی لپاره اړینه ده چې خپلو ژمنو ته غاړه کیږدي.

طالبانو ویلي چې یو ځل بیا یادونه کیږي چې د تیرو ناکامو تجربو د تکرار پر ځای، باید د واقعیت او عقلانیت پر بنسټ حل لاره غوره شي.

جمهورخبري آژانس