له افغانستانه په ملاتړ د قطر ټینګار؛ د سولې او بیارغونې لپاره له نړیوالې ټولنې غوښتنه وکړه

په ملګرو ملتونو کې د قطر دایمي استازې مرستیالې جواهره بنت عبدالعزیز السویدي د ملګرو ملتونو د بشري حقونو شورا په ۶۰مه غونډه کې په افغانستان کې ژورو بشري ستونزو ته اشاره وکړه او له نړیوالې ټولنې یې وغوښتل چې په دې هېواد کې د بیارغونې او سولې لپاره عملي ګامونه پورته کړي.

د جمهور اژانس د خبر له مخې، په ملګرو ملتونو کې د قطر د دولت مرستیالې جواهره بنت عبدالعزیز السویدي د بشري حقونو شورا په ۶۰مه غونډه کې د خپلې وینا په ترڅ کې د افغانستان پر وړاندې ګڼ شمېر ننګونو ته اشاره وکړه.

هغې وویل چې هېواد له اقتصادي بحرانونو، پراخې بې کارۍ، بیړنیو بشري اړتیاوو، د اقلیم ستونزو، فقر، لوږې، نړیوالو بندیزونو، کنګل شویو شتمنیو او د کډوالو بیرته راستنیدو سره مخ دی.

د دې ننګونو له امله په افغانستان کې د بشري وضعیت د خرابیدو په ټینګار سره، میرمن السویدي له نړیوالې ټولنې څخه وغوښتل چې د افغان ادارو د بیارغونې، بشري مرستو ته د لاسرسي ډاډ ترلاسه کولو او په هیواد کې د ټولو ښکیلو خواوو ترمنځ د خبرو اترو د پرمختګ لپاره خپل ملاتړ ته دوام ورکړي.

د هغې په وینا، دا اقدامات کولی شي د تلپاتې سولې د ټینګښت او په نړیواله ټولنه کې د افغانستان د بیا یوځای کیدو لپاره اړین شرایط رامینځته کړي.

هغې دا هم یادونه وکړه چې د قطر حکومت د افغانستان د خلکو سره ولاړ دی او په دې وروستیو کې یې پنځه الوتکې چې ۱۰۰ ټنه بشري مرستې یې لیږدولي دي هیواد ته لیږلي دي.

هغې وویل چې دا مرسته د قطر د هغو ژمنو یوه برخه ده چې په اوسنیو سختو شرایطو کې د افغان وروڼو ملاتړ کوي.

جمهورخبري آژانس