ترکیه د کرنې او ځنګلونو برخو کې له طالبانو سره همکاري کوي

د ترکیې د کرنې وزارت د کرنې او ځنګلدارۍ په برخو کې له طالبانو سره خپله همکاري اعلان کړې ده.

د جمهور خبري آژانس د خبر له مخې طالبانو د کرنې، اوبو لګولو او مالدارۍ وزارت نن شنبې (د وږي ۱۵مه) په یوه بیان کې وویل چې د دې وزارت د کرنې او مالدارۍ مرستیال وزیر مولوي اعظم عثماني، د ترکیې د کرنې او ځنګلدارۍ وزارت د کرنې او ځنګلدارۍ د څیړنې عمومي ریاست ته لاړ او د دې ادارې له عمومي رییس او نورو چارواکو سره یې ولیدل.

دواړو خواوو د کرنې او ځنګلدارۍ په مختلفو برخو کې د نظرونو او معلوماتو تبادلې په اړه بحث وکړ.

د ترکیې د کرنې او ځنګلدارۍ د څیړنې عمومي رییس د کرنې او ځنګلدارۍ په برخو کې د طالبانو سره د همکارۍ لپاره د دې ادارې جامع چمتووالی اعلان کړ.

د طالبانو د کرنې او مالدارۍ مرستیال وزیر مولوي اعظم عثماني، د کرنې او ځنګلدارۍ د څیړنې په برخه کې د تخنیکي او علمي ظرفیتونو د ښه کولو پر اهمیت ټینګار وکړ او هیله یې څرګنده کړه چې دا همکاري به په افغانستان کې د طبیعي سرچینو مدیریت او د کرنې دوامداره پراختیا کې مرسته وکړي.

جمهورخبري آژانس