ډیموکراټ سناتور د امریکا د پوځ د افغان ملګرو د ساتنې لپاره د قانون د چټک تصویب غوښتنه کوي
ډیموکراټ سناتورې ایمي کلوبوچار د امریکا له کانګرس څخه وغوښتل چې د «افغان متحدینو لپاره د ژمنې ساتلو» دوه اړخیز قانون ژر تر ژره تصویب کړي.
دا قانون به هغو افغانانو ته چې په تیرو دوو لسیزو کې یې په افغانستان کې د امریکایي ځواکونو سره خدمت کړی دی اجازه ورکړي چې په امریکا کې دایمي استوګنه ترلاسه کړي.
د جمهور آژانس د خبر له مخې، دا غوښتنه د امریکا د کډوالو مهاجرت او ګمرکي تطبیقاتو له خوا د ځینو پخوانیو امریکایي پوځي همکارانو د شړلو او توقیف په اړه د مخ په زیاتیدونکو اندیښنو په منځ کې راځي.
وړاندیز شوی قانون موخه د زرګونو هغو افغان اتباعو ساتنه ده چې په هیواد کې د خپل وخت په جریان کې د امریکایي ځواکونو سره خدمت کړی، ترڅو دوی د احتمالي ګواښونو څخه خوندي کړي.
په هرصورت، د جمهوري غوښتونکو ځینو استازو د امنیتي اندیښنو او د کډوالۍ د سختو پالیسیو د دوام په حواله د افغان کډوالو د چټک منلو مخالفت کړی دی چې د ډونالډ ټرمپ په دوره کې یې شدت موندلی دی.
دا چلند په ځانګړي ډول د افغانستان په ګډون د مسلمانو هیوادونو د مهاجرینو لپاره سخت دی.
سناتورې ایمي کلوبوچار په خپلو څرګندونو کې ټینګار وکړ چې د دې لایحې تصویب نه یوازې د متحده ایالاتو لپاره اخلاقي دنده ده، بلکې د خپلو افغان متحدینو سره د دې هیواد د ژمنې نښه هم ده.
د دې لایحې د تصویب لپاره په کانګرس کې خبرې اترې لاهم روانې دي، او د دواړو ګوندونو د استازو ترمنځ تودې بحثونه تمه کیږي.
د کډوالو د حقونو فعالینو هم په کانګرس غږ کړی چې د دې لایحې تصویب ګړندی کړي ترڅو د متحده ایالاتو د اردو د افغان ملګرو راتلونکی خوندي کړي.
جمهورخبري آژانس
