په فرانسه کې د «په جلاوطنۍ کې د افغانستان شنه ګوند» په نوم یو نوی سیاسي غورځنګ د خپل شتون اعلان وکړ.
د جمهور آژآنس د خبر له مخې، افغانستان د شنه ګوند په نوم یو نوی سیاسي غورځنګ نن پنشنبې (د زمري ۳۰ مه) په یوه اعلامیه کې وویل چې دا سیاسي غورځنګ د افغانانو او د هغوی د متحدینو څخه راپورته شوی دی.
د غورځنګ په اعلامیه کې ویل شوي چې دا ګوند، چې مشري یې رضا جعفري کوي، د افغانستان د راتلونکي لپاره د ډیموکراسۍ، ټولنیز عدالت، چاپیریال او سولې پر بنسټ ولاړ لید لري.
په اعلامیه کې زیاته شوې چې د دې ګوند غړي سیاسي او ټولنیز شخصیتونه او ځواکونه، د پارلمان پخواني غړي، پخواني وزیران او دولتي چارواکي، ځوان سیاستوال، او همدارنګه د هیواد ځوانان چې په جلاوطنۍ کې دي، شامل دي.
ویل کیږي چې د اقلیم عدالت، د خوړو حاکمیت او د انرژۍ خپلواکۍ پر بنسټ د هیواد د بیارغونې لپاره د شنه او ټولنیز پروګرام رامینځته کول د دې ګوند یو له اهدافو څخه دی.
جمهور آژانس
