د طالبانو ډلې د "هري کاروان" ترانسپورتي شرکت چارواکي احضار کړل

په هرات ولایت کې سیمه ییزو طالبانو اعلان وکړ چې تېره شپه په دې ولایت کې د یوې مرګونې ترافیکي پېښې وروسته یې د "هري کاروان" ترانسپورتي شرکت چارواکي احضار کړي دي.

د جمهور خبري آژانس د خبر له مخې د هرات د والي د رسنیو دفتر نن چهارشنبې (د زمري ۲۹مه) په یوه اعلامیه کې وویل چې د دې ولایت د والي اسلام جار په امر، د "هري کاروان" ترانسپورتي شرکت چارواکي تر بلې خبرتیا پورې د څېړنې لپاره احضار شوي دي ترڅو دا زړه بوږنوونکې پېښه په بشپړه توګه وڅېړل شي او موضوع اړوندو ادارو ته وسپارل شي ترڅو اړین او قانوني اقدامات وشي.

د یادونې وړ ده چې تېره شپه شاوخوا ۸ بجې، د "هري کاروان" شرکت اړوند یو ۵۸۰ ډوله مسافر وړونکی بس چې له ایران څخه کابل ته راستانه شوي کډوال لېږدول، د هرات ولایت د ګذرې ولسوالۍ په شاوخوا کې له موټرسایکل او مزدا موټر سره ټکر وکړ چې له امله یې ۷۸ کسان ووژل شول.

جمهورخبري آژانس