ملګري ملتونه: د افغان ښځو پر زده کړو بندیز یوه لویه ضایعه ده

د افغانستان لپاره د ملګرو ملتونو مرستیاله ځانګړې استازې وايي چې د افغان ښځو پر زده کړو بندیز یوه لویه ضایعه ده.

د جمهور خبري آژانس د خبر له مخې، د افغانستان لپاره د ملګرو ملتونو د سرمنشي د ځانګړې استازې مرستیاله جورجټ ګګنون نن شنبې  (د زمري ۱۵مه) وویل چې په افغانستان کې د نجونو او ښځو پر زده کړو بندیز د دې هیواد د ټولې ټولنې لپاره یوه لویه ضایعه ده.

هغې زیاته کړه: "ما په ټول افغانستان کې سلګونه نجونې ولیدلې چې ښوونځیو ته ځي. تاسو هغوی په سړکونو کې لیدلي، ښوونځیو او پوهنتونونو ته ننوتل او بهر. زه فکر کوم چې د کابل پوهنتون لږترلږه نیمایي زده کونکي نجونې وې؛ مګر اوس، البته، تاسو نور دا نه ګورئ."

هغې وویل چې دا واقعیا زړه ماتونکی دی. دا د ټولې ټولنې لپاره یوه لویه ضایعه ده، نه یوازې د دې نجونو او د دوی د کورنیو لپاره؛ بلکې په عمومي توګه د ټولنې لپاره.

د یادونې وړ ده چې د طالبانو ډلې لخوا د افغانستان د اشغال سره سم، په تیرو څلورو کلونو کې په هیواد کې ښځې او نجونې د زده کړې او کار څخه محرومې شوې دي.

جمهورخبري آژانس