د طالبانو د کار او ټولنیزو چارو وزارت د لومړي ځل لپاره د قطر د سلطنت د ګډ دولتي شرکت او په افغانستان کې د خصوصي کارموندنې شرکتونو ترمنځ د افغان کارګرانو د لیږلو په اړه یوې هوکړې ته رسیدلی، چې پر بنسټ یې، په لومړي پړاو کې، د افغان کارګرانو لپاره ۷۰۰ کاري فرصتونه په پام کې نیول شوي دي.
د جمهور آژانس د خبر له مخې د یاد وزارت ویاند، سمیع الله ابراهیمي نن دوشنبې (د چنګاښ ۳۰ مه) وویل چې وزارت یې دا پرمختګ د کار او ټولنیزو چارو وزارت او د قطر د سلطنت د دولتي چارواکو ترمنځ د تخنیکي همغږۍ، غونډو او موافقو پایله ده، او اصلي هدف یې دا دی چې افغان کارګران په قانوني، خوندي او باعزته ډول بهر ته واستوي او په راتلونکي کې د دوی د حقونو لپاره اړین خوندیتوب چمتو کړي.
طالبانو وویل چې د کارګرانو د ثبت او منلو پروسه به په قانوني او مستند ډول د خصوصي کارموندنې شرکتونو لخوا د وزارت د کارګرانو د لیږلو د څانګې تر څارنې لاندې پیل شي. د نوم لیکنې د څرنګوالي، شرایطو او ځانګړو مرکزونو په اړه جزئیات به وروسته د رسمي اعلان له لارې خپاره شي.
هغه زیاته کړه چې د دې پروسې د رسمي پیل وروسته، دوی باید خپل جزئیات یوازې په رسمي، مستند او تصویب شویو مرکزونو کې ثبت کړي او د هر ډول احتمالي ناوړه ګټه اخیستنې مخنیوي لپاره غیر مسؤل اشخاصو، جعلي شرکتونو یا نامعلومو چارواکو ته له راجع کولو څخه ډډه وکړي.
جمهورخبري آژانس
