په پاکستان کې افغان کډوال له جدي روغتیايي محدودیتونو سره مخ دي

د بې پولې ډاکټرانو سازمان راپور ورکړی چې په پاکستان کې افغان کډوال د نیول کیدو او جبري شړلو له ویرې روغتیايي مرکزونو ته له تګ څخه ډډه کوي. دا وضعیت د کډوالو فزیکي او رواني روغتیا ته جدي ګواښ دی.

د جمهورخبري آژانس د راپور له مخې، د بې پولې ډاکټرانو سازمان په یوه نوي راپور کې اعلان کړی چې په پاکستان کې افغان کډوال د نیول کیدو او شړلو له ویرې روغتیايي خدماتو ته له لاسرسي څخه منع شوي دي.

دغه سازمان وايي چې محدودیتونو نه یوازې د کډوالو فزیکي روغتیا له خطر سره مخ کړې، بلکې د دوی په رواني حالت یې هم ژور منفي اغیزه کړې ده.

د راپور له مخې، د پاکستان حکومت د ۲۰۲۳ کال د نومبر راهیسې د افغان کډوالو د جبري شړلو کمپاین پیل کړی دی. په پیل کې، کمپاین بې اسناده کډوال په نښه کړل، خو اوس حتی هغه کډوال چې د اعتبار وړ قانوني اسناد لري، په شمول د استوګنې کارتونه، د شړلو له خطر سره مخ دي.

دې وضعیت ډیری کډوال د روغتونونو او روغتیايي مرکزونو څخه د وتلو لامل شوي، ځکه چې د کشف او توقیف ویره دوی د اړینو طبي خدماتو ته د لاسرسي مخه نیولې ده.

ایم ایس ایف زیاته کړه چې که څه هم د استوګنې کارت لرونکو اخراج د ۲۰۲۵ کال د جولای راهیسې په موقتي ډول ځنډول شوی، خو دا اقدام د مهاجرینو اندیښنې او اضطراب کم نه کړ. ډیری کډوال په ویره او ناڅرګندتیا کې ژوند کوي، او دې وضعیت د دوی رواني او فزیکي روغتیا نوره هم نازکه کړې ده.

نړیوال سازمان د پاکستان له حکومت څخه غوښتي چې د مهاجرینو په اړه خپلې پالیسۍ بیاکتنه وکړي او د ټولو لپاره، په ځانګړي توګه د زیان منونکو ډلو لپاره روغتیایی خدماتو ته مساوي لاسرسی ډاډمن کړي.

ایم ایس ایف هم له نړیوالې ټولنې څخه وغوښتل چې د بشري بحران د خرابیدو مخنیوي لپاره د افغان مهاجرینو ملاتړ وکړي.

جمهورخبري آژانس