د لوستلو کلتور ته وده ورکول د روښانه او دوامداره راتلونکي جوړولو لپاره خورا مهم دي

په افغانستان کې د ملګرو ملتونو د مرستندویه پلاوي (یوناما) مشرې وویل چې د نجونو او هلکانو ترمنځ د لوستلو کلتور ته وده ورکول د روښانه او دوامداره راتلونکي جوړولو لپاره خورا مهم دي.

د جمهور آژآنس د خبر له مخې  په افغانستان کې د ملګرو ملتونو د مرستندویه پلاوي (یوناما) د رسنیو دفتر تیره شپه (د چنګاښ ۲۴ مه) ناوخته په یوه بیان کې وویل چې د دې ادارې مشرې میرمن روزا اوتنبایوا د کابل د کتابونو د لومړي فیستیوال د پرانیستې په مراسمو کې د هرچا لپاره د کتابونو او سواد په بنسټیز ارزښت ټینګار وکړ.

اوتنبایوا وویل: کتابونه نه یوازې د معلوماتو لیږدونکي دي، دوی خوبونه لیږدوي، یادونه ساتي او تخیل او تخلیق هڅوي. د کتابونو له لارې، پوهه له یو نسل څخه بل نسل ته او له یوې پولې څخه بلې ته لیږدول کیږي. کتابونه موږ سره مرسته کوي چې یو بل په ښه توګه درک کړو. دوی خواخوږي او باور رامینځته کوي.

اوتنبایوا ټینګار وکړ چې په هر کور، کلي او ټولګي کې د نجونو او هلکانو ترمنځ د لوستلو کلتور ته وده ورکول د افغانستان د پراخ ظرفیت خلاصولو او د روښانه او دوامداره راتلونکي جوړولو لپاره خورا مهم دي.

د یادونې وړ ده چې د کابل د کتابونو لومړی فیستیوال په کابل کې ترسره شو، چې روڼ اندو، خپرونکو، ښوونکو او نړیوالو شریکانو پکې ګډون کړی و، او هدف یې د افغانستان د بډایه ادبي میراث ساتل او د هیواد د لوستلو متحرک او پراخه کلتور پیاوړی کول دي.

جمهورخبري آژانس