اروپايي ټولنې په افغانستان کې د روږديتوب پر وړاندې پر مبارزې ټینګار وکړ

د مخدره توکو د ناوړه ګټه اخیستنې او غیرقانوني قاچاق پر وړاندې د نړیوالې ورځې په مناسبت، اروپايي ټولنې په افغانستان کې د روږديتوب سره د مبارزې ژمنه وکړه.

په کابل کې د اروپايي ټولنې د رسنیو دفتر د پنشنبې په ورځ (د چنګاښ ۵مه) د مخدره توکو د ناوړه ګټه اخیستنې او غیرقانوني قاچاق پر وړاندې د نړیوالې ورځې په مناسبت په یوه بیان کې وویل چې اتحادیه د روږديتوب پر وړاندې د مبارزې په برخه کې د افغانانو د ملاتړ لپاره پر خپلې ژمنې ټینګار کوي.

په اعلامیه کې زیاته شوې چې اروپايي ټولنه، د ملګرو ادارو سره یوځای، د مخدره توکو غوښتنې کمولو او دوامداره معیشت رامینځته کولو کې د افغانانو ملاتړ کوي.

اتحادیې ټینګار کړی چې دا پانګونه به د یوې روغې راتلونکې لامل شي.

په بیان کې ویل شوي چې د مرستندویه ادارو له لارې زموږ د ۲۶ ملیون یورو ملاتړ په افغانستان کې د اروپايي ټولنې د هڅو اغیز ښیې.

موږ د زرګونو افغانانو سره مرسته کوو چې د روږديتوب او رواني اختلالاتو څخه خلاص شي ترڅو دوی ځواکمن شي او د هیواد د ټولنې او اقتصاد لپاره ارزښتناکه شتمني شي.

دوامداره معیشت او اقتصادي بیا یوځای کیدل د دوامداره بیا رغونې او روږدي کیدو مخنیوي لپاره خورا مهم دي.

د روغتیا او معیشت سره د نښلولو له لارې، اروپايي اتحادیه ډاډ ورکوي چې زیان منونکي اشخاص او ټولنې د ښه راتلونکي جوړولو لپاره ریښتیني اقتصادي بدیلونه ولري.

جمهورخبري آژانس